ئەندامێکی کوردی پەرلەمانی عێراق رایگەیاند، لەسەر گومانی گەندەڵییەک کە بە 20 ملیار دۆلار دەخەمڵێنرێت، لیژنەیەک لە پەرلەمانی عێراق بۆ لێکۆڵینەوە لەو بابەتە پێکهێنرا.

سۆران عومەر، ئەندامی پەرلەمانی عێراق ئاماژەی بەوەکرد:" لیژنەیەک لەسەر گومانی گەورەترین گەندەڵی لە عێراق پێکهێنرا، کە لە 13 پەرلەمانتار پێکهاتووە، کە گومان دەکرێت لە بەنداوی فاو ئەنجامدرابێت ".

دەستمان بە لێکۆڵینەوە کردووە

ئەوەشی خستەڕوو:" دەستمان بە کار کردووە بۆ لێکۆڵینەوە و بەدواداچوون لەسەر کۆمپانیای گشتی بەندرەکانی عێراق کردووە، بە تایبەت گرێبەست و داهات و کارەکانیان لەبەندەری فاو، چونکە گومانی گەندەڵییەک بە قەبارەی 20 ملیار دۆلار دەکرێت ".

بەندەری فاوی گەورە بە یەکێک لە گەورەترین بەندەرەکانی کەنداوی عەرەبی دادەنرێ و دەیەم گەورەترین بەندەرە لە جیهاندا.