سەرۆک وەزیرانی هەرێمی
کوردستان رایگەیاند، هەرچییان پێبکرێت بۆ کەسوکاری شەهیدان و ئەنفالکراوان دەیکەن.
مەسرور بارزانی سەرۆک
وەزیرانی هەرێمی کوردستان رایگەیاند:" ئەمڕۆ
پێشوازیمان لە لیژنەی شەهیدان و قوربانییان و زیندانییانی سیاسی سەر بە ئەنجومەنی
نوێنەرانی عێراق کرد".
ئاماژەی بەوەشکرد:" گفتوگۆمان لەبارەی پەرەپێدانی هاریکاری و
هەماهەنگی نێوان حکومەتی هەرێمی کوردستان و حکومەتی فیدرال لە پێناو خزمەتکردنی
زیاتری کەسوکاری شەهیدان و ئەنفالکراوان و زیانلێکەوتووانی دەستی رژێمی پێشووی
عێراق کرد".
خەڵکی کوردستان قوربانییەکی زۆری داوە
باسی لەوەشکرد:" دووپاتمانکردەوە، خەڵکی کوردستان قوربانییەکی
زۆری داوە و رووبەڕووی دڕندانەترین شاڵاوەکانی ئەنفال و کیمیاباران و کۆمەڵکوژی و
وێرانکاری بووەتەوە و داوامان لە حکومەتی فیدراڵ ئەوەیە، کە رێز لە
قوربانیدانەکانی خەڵکی کوردستان و هەموو قوربانییانی دەستی رژێمی پێشووی عێراق
بگرێت و بە شێوەیەکی شایستە، قەرەبووی کەسوکاری شەهیدان و زیانلێکەوتووانی رژێمی
پێشوو بکاتەوە".
مەسرور بارزانی روونیشیکردەوە:" هاوکات جەختیشمان کردەوە کە
هەرچی پێمان بکرێت بۆ خزمەتکردنی کەسوکاری شەهیدان و ئەنفالکراوان دەیکەین و
کەمتەرخەمی ناکەین".