وتەبێژی وەزارەتی دارایی سەبارەت بە تەواوبوونی رێكاری وردبینی و هەروەها رەوانەكردنی مووچە بۆ مووچەی فەرمانبەرانی هەرێم، زانیاری نوێی ئاشكرا كرد.
هونەر جەمال، وتەبێژی وەزارەتی دارایی لە راگەیەندراوێكدا بڵاویكردەوە:" دوو هەفتە لەمەوبەر لیستی مووچە و تەرازووی پێداچوونەوەیان بۆ بەغدا ناردووە، بەڵام جێگای سەرسوڕمانە كە ئێستا عێراق مووچەی فەرمانبەرانی دواخستووە، لەكاتێكدا لە عێراق مووچە دراوە و كێشەی نەختینە نییە".
نابێت مووچە ببەسترێتەوە بەهیچ كێشەیەكی دیكەوە
ئاماژەی بەوەشكردووە:" وردبینی بۆ لیستی مووچە كراوە، ئیدی بیانووی چییان هەیە نازانن، بۆیە نابێت مووچە ببەسترێتەوە بەهیچ كێشەیەكی دیكەوە، ئەوان لەسەرووی هەموو كێشەكانەوە دەرگایان كرایەوە لە مەسەلەی داهاتی ناوخۆ و توویانە هەرچی داهاتی فیدراڵی هەیە ئامادەن رادەستیبكەن".
هەژماری من، هیچ گرفتێكی دروستنەكردووە و گرفتێكی تەكنیكی و یاسای لەسەر نیە
سەبارەت بە بەبانیكردنی مووچە، وتەبێژی وەزارەتی دارایی ئەوەی خستەڕوو:" هەژماری من هەیە و هیچ گرفتێكی دروستنەكردووە و گرفتێكی تەكنیكی و یاسای لەسەر پڕۆژەكە نیە، بەو هیوایەن مەبەستەكەیان تەنها بۆ ئەوەنەبێت بیانەوێت جارێكی دیكە كێشە بۆ مووچە دروستبكەن".