سەرۆکی یەکێتی نیشتمانی کوردستان رایگەیاند، پێویستە هەمووان بەیەکەوە رووبەڕووی مەترسییەکانی تیرۆر ببنەوە.

 میدیای فەرمی یەکێتی نیشتمانی کوردستان بڵاویکردەوە:" بافڵ جەلال تاڵەبانی سەرۆکی یەکێتیی نیشتمانیی کوردستان لە پنتاگۆن لەگەڵ دانیال شاپیرۆ، جێگری یاریدەدەری وەزیری بەرگریی ئەمریکا بۆ رۆژهەڵاتی ناوەڕاست کۆبووەوە".

مەترسییەکانی بەردەم ئاسایش و سەقامگیریی ناوچەکە گفتوگۆیان لەبارەوەکرا

ئاماژەی بەوەشکرد:" لە کۆبوونەوەکەدا کە دەرباز کۆسرەت رەسوڵ لێپرسراوی مەکتەبی پەیوەندییەکان ئامادەبوو، دۆخی ئەمنی و مەترسییەکانی بەردەم ئاسایش و سەقامگیریی ناوچەکە گفتوگۆیان لەبارەوەکرا و جەخت لە فراوانکردنی هەماهەنگییەکان لەپێناو پاراستنی ئاشتی و رووبەڕووبوونەوەی تیرۆر کرایەوە".

باسی لەوەشکرد:" بافڵ جەلال تاڵەبانی لەبارەی رۆڵی ئەمریکا و هێزەکانی هاوپەیمانان لە ناوچەکە، ئاماژەی بەوەکرد، بەگرنگییەوە لە بەردەوامیی هەماهەنگییەکان و سەرخستنی گفتوگۆکانی رێککەوتنی نێوان ئەمریکا و عیراق دەڕوانن و پێویستە هەمووان بەیەکەوە رووبەڕووی هەڕەشەکان و مەترسییەکانی تیرۆر ببنەوە".

پشتیوانییەکانی ئەمریکا و هێزەکانی هاوپەیمانی نێودەوڵەتی بەرز دەنرخێنن

میدیای یەکێتی روونیشیکردەوە:" لەبارەی هەوڵەکان بۆ یەکخستنەوە و بونیادنانی هێزێکی نیشتمانیی تۆکمە، سەرۆکی یەکێتی وتی، پشتیوانییەکانی ئەمریکا و هێزەکانی هاوپەیمانی نێودەوڵەتی بەرز دەنرخێنن، هیوادارن لە داهاتووشدا هاوکار و هەماهەنگبن بۆ بەدیهێنانی ئەو ئامانجە باڵایە و پاراستنی ئاشتی و ئارامیی ناوچەکە".