بەڕێوەبەری گشتیی پەروەردەی سلێمانی لە بارەی پێشنیازێكەوە بۆ بەشداریكردن لە خولێكی بەهێزكردن و پێدانی بڕێك پارە بە مامۆستایان لە بەرانبەریدا، زانیاری بڵاویكردەوە.

 دڵشاد عومەر، بەڕێوەبەری گشتیی پەروەردەی سلێمانی لە میانەی لێدوانێكدا رایگەیاند:" بەهیچ شێوەیەك لە وەرزی هاویندا دەوامی ناچاری بە خوێندكاران ‌و مامۆستایان ‏ناكرێت، ئەوەی پێشنیاركراوە خولی بەهێزكردنە بۆ نەك دەوامی ناچاری".

تەواوی خەرجییەكە لەسەر وەزارەتی پەروەردەيه

ئەوەشیخستەڕوو:" ئەم پێشنیارە لە ساڵانی رابردوودا بوونی هەبووە و ‏خوێندكار بڕێك پارەی دەدا، بەڵام ئەمساڵ پێشنیازیان كردووە خوێندكار هیچ ‏پارەیەك نەدات، تەواوی خەرجییەكە لەسەر وەزارەتی پەروەردە ببێت". 

بۆ تەواوی پڕۆژەكە، ‏داوای دوو ملیار ‌و 547 ملیۆن و 500 هەزار دینارمان كردووە

ئاشكراشی كردووە:" بۆ تەواوی پڕۆژەكە، ‏داوای دوو ملیار ‌و 547 ملیۆن و 500 هەزار دینارمان كردووە و بۆ هەموو ئەوانەی بەشداری ‏دەكەن بڕێك پارە دیاری كراوە، بەنموونە هەر مامۆستایەك كە ئارەزوومەندانە ‏بەشدار دەبێت، بۆ هەر مانگێك 400 هەزار دینار وەردەگرێت‌".