بۆ خاتوو خانزادی شانەدەر

ئەگەرچی ناوی تۆ ئێستا لە دونیا دژوارەکەی میدیاو سوشیال میدیادا بە (شانەدەر زید) ناسراوە، بەڵام تۆ لە  نەژادی پاکی ئەم نیشتمانەی ، لە قەومی نەجیبی کورد و  خەڵکی ئەم خەرەندەی لای رواندزی ،٧٥ هەزار ساڵ پێش ئێستا ماناکانی ژیان و داستانەکانی مانەوەت بۆ مرۆڤایەتی نوسییەوە و چاندی وەرزێری و چاندی فەرهەنگت پەخشکرد .

ئێستاش هەر تۆ جارێکی تر بویتەوە بە لانکی شارستانی و مرۆڤایەتی بۆ دۆزینەوەی مانا قوڵەکانی ژیان و ئاوەدانی دەبێ بگەڕێینەوە بۆ لای تۆ،  خاتوو شانەدەر  ئاگاداری نەوەکانت لە جەوری مێژوو بە جنۆکە و عفریت  دەناسرێن و خاک و کێڵگەو کانیت دابەشی چوار کراوەو زمانەکەت یاساخ و پۆشاکەکەت جورم و باسی مێژووشت تاوانە.

تۆ ئەزانیت کەرکوک و عەفرین و قامیشلۆو ئامەد و کرماشان بێ نازو لە قەفەزی دیلیدان ؟ ئای خاتوون  خۆزگە ئاگات لەم بێ کەسی و تەنیایە کورد ئەبوو ، خۆزگە ئاگایەکیشت لە بێ مروەتی ناوخۆیی و لێکترازانی ناو ماڵی خۆشمان ئەبوو!