عوسمانی حاجی مەحمود لە پەیامێکیدا ئاماژەی بەوەکرد، کوردستان نغرۆی نادادی وستەم وگەندەڵی و نا ئارامی و بێ ئومێدی و بێ متمانەییەکی زۆر بووە.
ئەمڕۆ پێنجشەممە ٢٥ی تشرینی دووەم، عوسمانی حاجی مەحمود کەسایەتی سیاسی دیاری کوردستان و یەکێک لە سەرکردەکانی پێشووی بزوتنەوەی گۆڕان رایگەیاند:" ھەرێمی کوردستان نغرۆی نادادی وستەم وگەندەڵی و نا ئارامی و بێ ئومێدی و بێ متمانەییەکی زۆر بووە کە خۆپیشاندانەکانی چەند رۆژی رابردووی خوێندکاران و ناڕەزایەتی فراوانی چین و توێژەکانی دیکەی کوردستان دەرئەنجامی ئەو سیاسەتە خراپەی بەرێوەبردن و ئیدارەدانە بوون و ئایندەی ھەرێمەکەیان خستووەیتە بەردەم چەندین مەترسیەوە".

ئاماژەی بەوەشکرد:"  ھەڵسوکەوتی ئەم چەند رۆژەی دەسەڵات کە لەبری بە دەنگەوەھاتن و جێبەجێکردنی داوا و مافە رەواکانیان بەھەڕەشە و دەستگیرکردن و شەق و توندوتیژی رووبەڕووی خوێندکاران بوونەوە تەواو ناڕەوایە و بەتوندی ئیدانەی دەکەین و پێمان وایە رێگای دروست بۆ چارەسەری مافەکانی خوێندکاران و کۆمەڵگەی کوردستان بەگشتی بەرپاکردنی عەدالەتی کۆمەڵایەتی و بەرگرتنی راستەقینەیە لەو بەھەدەردان و نایەکسانی و گەندەڵیەی کە سەرتاپای جومگە و پێگەکانی حکومڕانی ھەرێمی کوردستانی گرتووەتەوە".

قۆناغی ئێستا پێویستی بەبیستنی دەنگی ئەقڵ و ھەڵوێست وکاری بەرپرسانەیە

باسی لەوەشکرد:" قۆناغی ئێستا پێویستی بەبیستنی دەنگی ئەقڵ و ھەڵوێست وکاری بەرپرسانەیە نەک بەکارھێنانی توندوتیژی و زیندانی کردن، جگە لە خەڵک و میدیا و دامەزراوە و رێکخراوە جۆراوجۆرەکان، ئەوەتا بڕیار بەدەستان خۆشیان لە راگەیاندەکانەوە باس لەدزی وگەندڵی و خراپ بەڕێوەبردنی وڵات دەکەن بەبێ ئەوەی ھیچ ھەنگاوێکی چاکسازیان ببینرێ و پێ ناچێ لە بیری گۆڕینی ئەقڵیەتی حکومڕانیاندا بن بۆ دۆزینەوەی چارسەرێکی سەرەتایی ، بە ھێنانەوەی بیانوو و تۆمەت و گومانیش ناتوانن گرفت و کێشە بنەڕتیەکانی ژیانی خەڵک بەلاڕێداببەن و ھەوڵ و کۆششی خەڵک بۆ گۆڕانکاری خامۆش بکەن".

رێگە نەدەن ھێز وگروپی سیاسی ئاراستەی شەپۆلی ناڕەزایەتیەکانتان بۆمەرامی تایبەت بەکاربھێنن

عوسمانی حاجی مەحمود وتیشی:" خوێندکاران و چین وتوێژەکانی دیکەی خەڵکی کوردستان ، جارێکی دیکە پشتیوانی ماف و داوا رەواکانتان دەکەین و داواکارین رێگە نەدەن ھێز وگروپی سیاسی ئاراستەی شەپۆلی ناڕەزایەتیەکانتان بۆمەرامی تایبەت بەکاربھێنن و تکامان وایە پەلاماری دەزگاو دامەزراوە خزمەتگوزارییەکان نەدەن".