دەزگای ئاسایشی هەرێم رایگەیاند، سێ تۆمەتباریان دەستگیرکردوە کە هەستاون بە سوتاندنی کەپری کاسپکارێک پاش دزیکردن لێی.

ئەمشەوی دووشەممە، دەزگای ئاسایشی هەرێمی کوردستان رایگەیاند، دوای بەداواداچوون و لێکۆڵینەوە بۆ سکاڵای هاوڵاتیەک سەبارەت بە سوتانی کەپرێکی فرۆشتنی سەوزە و میوەی کاسبکارێک لە شاری سلێمانی، پاش سووتانی لەلایەن چەند تۆمەتبارێک و زیانی زۆری ماددی لێدەکەوێتەوە؛ دەستبەجێ بەهەوڵی بەڕێوەبەرایەتی ئاسایشی سلێمانی، لەسەر فەرمانی دادوەری لێکۆڵینەوە لە توانرا (٣)تۆمەتباری ڕووداوەکە بدۆزرێتەوە و دەستگیربکرێن.

چوار جار کەپری کاسبکارەکەیان سوتاندووە

باسی لەوەش کردووە، لەماوەی رابردوودا پاش دزیکردن چوار جارە کەپری کەسبکارێکی شاری سلێمانی دەسوتێنن بەمەبەستی وونکردنی شوێن پەنجەی تاوانەکەیان و زیانی مادی زۆری لێ دەکەوێتەوە.

زیانی 28 ملیۆن دیناریان پێ گەیاندووە

راشیگەیاندووە، لەماوەی سوتانی سێ جاری پێشوتر نزیکەی 11 ملیۆن دینار زیانی دەبێ و لەسوتانی چوارەمی 17 ملیۆن دینار زیانی مادی پێ دەگات بە دزینی (دۆمەڵان و هەنگوین و چەندین تۆن سەوزە و میوە)و تەواوی کەپرەکەی دەسوتێنن.

بە ماددەی 342 دەستگیرکراون

دەزگای ئاسایشی هەرێم دەشڵێت، لەئێستادا تۆمەتباران بەماددەی 342 لەیاسای سزادان دەستگیرکراون و لێکۆڵینەوە لەدۆسیەکانیان بەردەوامە.