وەزارەتی دەرەوەی
ئەمەریکا بەیاننەمەیەکی لەبارەی یاسای بەرەنگاربوونەوەی لەشفرۆشی لە عێراق
بڵاوکردەوە.
وەزارەتی دەرەوەی
ئەمەریکا لە بەیاننامەیەکدا ئاماژەی بەوەکرد:" ویلایەتە یەکگرتووەکانی
ئەمەریکا بە قوڵی نیگەرانە لە داڕشتنی یاسای بەرەنگاربوونەوەی لەشفرۆشی و
هاوڕەگەزبازی لە عێراق کە ئەنجومەنی نوێنەرانی ئەو وڵاتە پەسەندی کردووە".
ئەو یاسایە هەڕەشە لە مافەکانی مرۆڤ
باسی لەوەشکرد:"
ئەو یاسایە هەڕەشە لە مافەکانی مرۆڤ و ئازادییە بنەڕەتییەکان دەکات کە بە دەستوور
پارێزراوبن، یاساکە دەبێتە هەڕەشە لەسەر کەسانێک لە عێراق و دەکرێت بۆ دروستکردنی
ئاستەنگ لەبەردەم ئازادی رادەربڕین و ئازادی کەسی بەکاربهێنرێت، هەروەها ئەو
ئەگەرە رێکخراوەکانی کۆمەڵگەی مەدەنی لە تەواوی عێراق دەگرێتەوە".
روونیشیکردەوە:"
ئەو یاسایە توانای عێراق بۆ هەمەڕەنگکردنی ئابووری و راکێشانی وەبەرهێنانی بیانی
لاواز دەکات و زیان بە کار و گەشەی ئابووری وڵاتەکە دەگەیەنێت، رێزگرتن لە مافەکانی
مرۆڤ و تێکەڵبوونی سیاسی و ئابووری، بابەتێکی بنەڕەتییە بۆ ئاسایش و سەقامگیری
عێراق".
ژن گۆڕینەوە و هاوڕەگەزبازی سزای توندیان بۆ دانراوە
دوێنێ شەممە، غەریب
ئەحمەد ئەندامی ئەنجومەنی نوێنەرانی عێراق وتی:" ئەنجومەنی نوێنەران پرۆژەیاسای
تایبەت بە لەشفرۆشی پەسەندکردووە، لە هەموارەکەدا ژن گۆڕینەوە و هاوڕەگەزبازی سزای
توندیان بۆ دانراوە".
ئاشکراشیکرد:"
بەگوێرەی هەموارەکە، هاوڕەگەزباز بە بەندکردنی بۆ بۆ ماوەی 10 بۆ 15 ساڵ سزا
دەدرێت".