بەڕێوەبەرایەتی تەندروستی دهۆک سەرجەم ئەو دەنگۆیانەی رەتکردەوە، کە گوایە ئەمڕۆ لە نەخۆشخانەی لالاڤ ژنێک بەهۆی توشبوونی بە نەخۆشی کۆلێرا-ەوە گیانی لەدەستداوە و دەڵێت، ئەو ژنە بەهۆی نەخۆشی شێرپەنجەوە گیانی لەدەستداوە.
بەڕێوەبەرایەتی تەندروستی دهۆک لە راگەیەندراوێکدا سەبارەت بەو دەنگۆیانەی کە گوایە ژنێک بەهۆی نەخۆشی کۆلێراوە گیانی لەدەستداوە، ئاماژەی بەوەکرد:" ئەو نەخۆشە بەهۆی هەبوونی چەند نیشانەیەکەوە لە نەخۆشخانەیەکی دیکەوە گواستراوەتەوە بۆ نەخۆشخانەی لالاڤ و پشکنینی کۆلێراکەی نێگەتیڤ بووە".
ئەوەشی خستەڕوو:" ئەو ژنە نەخۆشی شێرپەنجەی هەبووە و هەر بەو هۆیەشەوە گیانی لەدەستداوە".
تاوەکو ئێستا هیچ حاڵەتێکی نەخۆشی کۆلێرا لە پارێزگای دهۆک تۆمارنەکراوە
راشیگەیاند:" تاوەکو ئێستا هیچ حاڵەتێکی نەخۆشی کۆلێرا لە پارێزگای دهۆک تۆمارنەکراوە و هەر حاڵەتێک تۆماربکرێت هاوڵاتییانی لێ ئاگادار دەکەینەوە".