رێبەر ئەحمەد وەزیری ناوخۆ رایگەیاند، لە چەند رۆژی داهاتوودا یاسای هەڵگرتنی چەک دەچێتە بواری جێبەجێکردنەوە و سەرجەم ئەو شوێنانەی چەک دەفرۆشن رێکدەخرێنەوە و بەشێوەی ئەلیکتڕۆنی مۆڵەتیان بۆ دروستدەکرێت.
رێبەر ئەحمەد وەزیری ناوخۆ لە میانەی بەشداریکردنی پرسەی هەردوو مامۆستای زانکۆ ( د. کاوان ئیسماعیل و د. ئیدریس حەمەخان) کە دوێنێ لەلایەن خوێندکارێکەوە شەهیدکران، لە کۆنگرەیەکی رۆژنامەوانیدا ئاماژەی بەوەکرد:" لەماوەی رابردوودا یاسایەکی نوێی هەڵگرتنی چەکمان لە پەرلەمانی کوردستان تێپەڕاند و مەسرور بارزانی سەرۆکی حکومەتی هەرێمیش جەختیلەوەکردووەتەوە کە دەبێت لە زووترین کاتدا ئەو یاسایە بچێتە بواری جێبەجێکردنەوە".
ئەوەشی خستەڕوو:" لە چەند رۆژی داهاتوودا یاسا نوێیەکی هەڵگرتنی چەک دەچێتە بواری جێبەجێکردنەوە و سەرجەم ئەو شوێنانەی چەک دەفرۆشن رێکدەخرێنەوە و بەشێوەی ئەلیکتڕۆنی مۆڵەتیان بۆ دروستدەکرێت".

بۆ داواکردنی مۆڵەتی چەک پێویستە کەسی پێشکەش چەند رێککارێکی کارگێڕی، یاسایی و تەندروستی بگرێتەبەر

راشیگەیاند:" بە گوێرەی یاسا نوێیەکە، بۆ داواکردنی مۆڵەتی چەک پێویستە کەسی پێشکەش چەند رێککارێکی کارگێڕی، یاسایی و تەندروستی بگرێتەبەر و هەر شوێنێکی فرۆشتنی چەکیش بەدەر لە رێککارە دیاریکراوەکان چەک بفرۆشێت، رێککاری یاسایی توندی بەرامبەر دەگیرێتەبەر".
رێبەر ئەحمەد وەزیری ناوخۆ روونیشیکردەوە:" لەئێستادا هەندێک پەیج لە تۆڕە کۆمەڵایەتییەکان بۆ چەند شتێکی ناڕەوا کاردەکەن، کە یەکێک لەوانە بڵاوکردنەوەی دەنگۆی ناڕاستە لەبارەی فرۆشتنی چەکەوە، بۆ بنەبڕکردنی ئەو دەنگۆیانەش داوامان لە بەڕێوەبەرایەتییەکانی پۆلیس و ئاسایش کردووە، لە زووترین کاتدا ئەو پەیجانە دیاریبکەن و رێککاری یاسایی بەرامبەر بگرنەبەر".

جەختیشیکردەوە:" هەر کەسێک داڵدەی تۆمەتباران بدات، وەک تاوانبار مامەڵەی لەگەڵ دەکرێت".