وتەبێژی دەستەی حەج و عەمرەی عێراق رایگەیاند، كۆمەڵێك كۆمپانیا لەژێر ناوی دابینكردنی ڤیزای حەج و عەمرە هەستاون بە فریودانی هاوڵاتیان كە هیچ مۆڵەتێكیان نەبووە.
حەسەن فەھد كەنانی، وتەبێژی دەستەی حەج و عەمرەی عێراق لە راگەیەندراوێكدا بڵاویكردەوە:" چەند كۆمپانیایەكی حەج و عەمرە ھاوڵاتییانیان فریوداوە و بانگەشەی ئەوەیان كردووە كە ڤیزا دابیندەكەن بۆ سعودیە و دەتوانن فەریزەی حەج بەجێبگەیەنن لە ژێر ناوی حەجی بازرگانیدا".
ئەو كۆمپانیایانە بەهیچ شێوەیەك مۆڵەتی كاركردنیان نییە
ئاماژەی بەوەشكردووە:" لە راستیدا ئەو كۆمپانیایانە بەهیچ شێوەیەك مۆڵەتی كاركردنیان نییە و رێكاری یاسایی لە دژیان گیراوەتەبەر و خاوەنەكانیان دەستگیركراون".
لەگەڵ وەزارەتی ناوخۆ و وەزارەتی حەج و عەمرەی سعودیە له هەماهەنگیدان
باسی لەوەشكردووە:" لەگەڵ وەزارەتی ناوخۆ و وەزارەتی حەج و عەمرەی سعودیە ھەماھەنگی ھەیە بۆ دانانی سنورێك بۆ ئەو كۆمپانیا و نوسینگانەی ھاوڵاتییان فریو دەدەن و بانگەشەی پێدانی ڤیزا دەكەن بەرامبەر بە بڕێكی زۆر لە پارە".
ھیچ كۆمپانیایەك و نوسینگەیەك ڤیزا دابینناكات
وتەبێژی دەستەی حەج و عەمرەی عێراق ئەوەشیخستووەتەڕوو:" ڤیزای حەج بۆ ھاوڵاتییان لەلایەن دەستەكەوە دەدرێت و ھیچ كۆمپانیایەك و نوسینگەیەك ڤیزا دابینناكات".