باڵیۆزی ئەمریكا لە عێراق سەبارەت بە كاری هاوبەشی نێوان وڵاتەكەی و عێراق، هەروەها كۆتاییهێنان بە ئەركی هاوپەیمانان زانیاری ئاشكرا دەكات.
ئڵینا رۆمانۆڤسكی، باڵیۆزی ئەمریكا لە عێراق لە میانەی چاوپێكەوتنێكیدا لەگەڵ ئاژانسی Reuters، رایگەیاند:" داعش هێشتا مەترسییەكی جددییە لەسەر عێراق و كارەكانی هاوپەیمانی سەربازی بە سەرۆكایەتی ئەمریكا لەگەڵ عێراق بۆ تێكشكاندنی تەواوەتی ئەو رێكخراوە هێشتا تەواو نەبوون".
ئاماژەی بەوەشكردووە:" ئێمە و عێراق باش لەوە تێگەیشتووین كە داعش هێشتا هەڕەشەكانی كۆتایی پێنەهاتووە، راستە كەمبوونەوەیەكی زۆری بەخۆیەوە بینیوە، بەڵام لەگەڵ ئەوەشدا كارەكانمان لە بنەڕەتدا كۆتاییان پێنەهاتووە و دەمانەوێت دڵنیابین لەوەی كە هێزە عێراقییەكان دەتوانن بەردەوام بن لە شكستپێهێنانی هەمیشەیی داعش".
ئاشكراشیكردووە:" رووداوەكانی ئەم دواییانە و هێرشە تیرۆریستییەكانی ئەو گروپە تیرۆریستییە بیرمان دەخاتەوە كە داعش دوژمنێكی تیرۆریستی هاوبەشە كە دەبێت لە هەموو شوێنێكدا شكستی پێبهێندرێت".
روونیشیكردەوە:" ئەمریكا و عێراق پابەندبوونێكی هاوبەشیان هەیە بۆ دەستەبەركردنی شكستی هەمیشەیی داعش، بەتایبەتیش لە چوارچێوەی كاركردنی پێكەوەیی بۆ داڕشتنی داهاتووی هاوبەشییەك بۆ كاری هێزە ئەمنییەكانی نێوان ئەمریكا و عێراق".